DRØYMEMIL I ARNA

(13.08.2020) På ein fin og magisk sommarkveld i Arna vart det levert fantastiske prestasjonar på den litt uvanlege distansen 1 engelsk mil (1609.34m). Det å løpe denne distansen på under 4 minuttar har vore omtalt som ‘drøymemila’ sidan lenge før Roger Bannister vart første mann under 4:00 med sitt legendariske 3:59.4-løp i 1954. På førehand var det annonsert at både kretsrekorden (Lars Ove Strømø 3:59.10 1985) og klubbrekorden i Gular (4:00.8 Arne Hamarsland 1959, sett på same dato det året) kunne bli slått. Og løparane innfridde og vel så det. Etter flott harejobb av Osterøys Trygve Feidje Mjelde i 900 meter tok Narve Gilje Nordås frå Sandnes og Team Ingebrigtsen over teten og heldt den til mål, med 3:56.62 går han inn som sjette beste i Norge gjennom tidene med 3:56.62 (og toppar dermed årets noko amputerte verdsstatistikk!). Like bak følgde våre to beste 1500m-løparar: Mats Hauge 3:57.25 (krets og klubbrekord) og Jacob Boutera med 3:57.38. Dei er då nr. 7 og 8 i Norge gjennom tidene. Bjørnar Sandnes Lillefosse hang godt med heile vegen og melde seg også inn i sub-4:00 klubben med 3:59.81 som gir 11.plass i Norge gjennom tidene. Lenger bak måtte Sondre Hoff gjere jobben sjølv, men jobba godt heile vegen og kom inn på 4:07.22. 1500m-passeringane fortel også mykje om prestasjonane: Mats 3:41.84 (nest beste løp nokon gong), Jacob 3:42.12 pers, Bjørnar 3:43.66 (pers med nesten 4 sekundar!) og Sondre 3:50.90 (pers med nesten 6 sekundar!). Hadde løpet vore 1500m så hadde det jo blitt pers med endå fleire sekundar, og då trur vi mellom anna at Bjørnar hadde slått Sverre Sørnes sin ‘Strandebarm-rekord’ på 3:42.9!

På bildet frå venstre: Anders Bjørndal, Gneist (klubbrekord 3.44.18), Narve, Jacob, Sondre, Bjørnar, Mats, og haren Trygve.

Elles sette Torbjørn Lysne årsbeste og banerekord på 200m med 22.04 og Timmi Anderl persa til 2:00.66 på 800m.

Norsk juniorrekord av Adele på 10000m!

(08.08.2020) Denne flotte friidrettshelga starta alt på torsdagen med hinderfestival på Fana. Her sette Gulars eigen Ine Bakken ny kretsbestenotering på 2000m hinder med 6:46.02 i sitt første hinderløp i karrieren. Vi håpar løpet gav meirsmak, og minner om at det har vore tynn deltaking på 3000m hinder i NM dei siste åra. Den gamle bestenoteringa var på 6:50.15 og var sett av Frida (Berge) Reiersølmoen på UM i 2011. Frida løp nokre år seinare på 9:56.79 på full distanse (3000 m hinder), og den kretsrekorden overlever nok årets sesong. På 200m flatt var Andreas Haara Bakketun uimotståeleg på oppløpssida og 21.44 i lett medvind (+1.0) var like bak årsbeste. Nærast kom sprintgruppas ‘Grand Old Man’, Torbjørn Lysne, som med 22.05 viste at han vil kjempe om finaleplass og plass på stafettlaget i årets NM. Tor Kringstad Vedde persa nok ein gong til 22.11, medan Daniel Alejandro Johnsen fekk 22.16 som er like bak årsbeste.

Fredag gjorde unge Adele Henriksen eit fantastisk løp og sette norsk juniorrekord på 10000m under Stadionmila i Kristiansand med 34:44.7. Dette var 5 sekundar under den gamle juniorrekorden frå 2015 og 8 sekundar under Eli Anne Dvergsdal sin gamle klubbrekord. Adele passerte 5000m på 17:30 og løp såleis siste halvdel av løpet 15 sekundar fortare enn den første, og ho vann dessutan dette E-heatet (mix) klart, noko som gjer prestasjonen endå meir imponerande. Mats Hauge følgde opp med 4.plass på 800m på solid pers og kretsårsbeste 1:50.02 på same stemne. Marius Vedvik hadde ein dårleg dag på 10000m og kom i mål på ei tid over halvtimen etter å ha hengt med teten i rundt 3000 meter.

Laurdag vart Jacob Boutera nr. 2 på 1500m under Østlandsmesterskapet på Jessheim med årsbeste 3:42.80, berre 5/100 bak fjorårspersen. I same heat persa Sondre Hoff til 3:56.29. Johannes Teigland persa til 3:57.05 og vann B-heatet klart, hans første løp under 4:00. På 400m årsdebuterte Torbjørn Lysne på distansen og fekk notert 49.25, 3/10 bak Leon Douglas, son til klubbrekordhaldar Quincy. Andreas Haara Bakketun løp sin første 400m hekk for sesongen og fekk bokført moderate 54.85, vi håpar hekkeformen er inne til junior-NM neste helg.

Kjempepers av Mats Hauge: 3:40.01!

(02.08.2020) Under eit stemne i finske Kuortane laurdag gjorde Mats Hauge eit kjempeløp på 1500m med 3.plass på 3:40.01. Dette er pers med over tre sekundar og mindre enn eit sekund bak Ove Talsnes sin 32 år gamle klubbrekord på 3:39.25. Teten passerte 400-800-1200 på 58.4-1:58.8-2:57.4 med Mats snaue sekundet bak på alle passeringane, og ein siste 300 på rundt 42 sekundar førte haugesundaren inn til pers og 20.plass på den norske alle-tiders-statistikken. Even Meinseth persa også i Kuortane (3.plass på 100m med 10.49 i vind+1.7), men var ikkje nøgde med løpet som førte han opp på 18.plass på den norske alle-tiders-statistikken.

Søndag hadde to av sprintarane våre tatt turen til Sandnes og Windsprint der. På 400m vart det ein hard kamp mellom Andreas Haara Bakketun og Tor Kringstad Vedde. Tor gjekk hardt ut og leia til det var under 10 meter igjen, men Andreas pressa seg føre han i mål og fekk 47.87. Tor persa til 47.93 og vart med det Gularløpar nr. 8 under 48.0 gjennom tidene.

Mange persar på Fana denne onsdagen også

(29.07.2020) Gular og Gneist held fram suksessen med Corona-stemne. På stemne nummer fire i rekka vart det nok ein gong mange persar på løpsdistansane, og stemnet samla brei deltaking frå aktive frå både Sørlandet, Austlandet og Trøndelag i tillegg til dei lokale. På 200m var Andreas Haara Bakketun raskast med 21.72 i lett medvind, her persa Tor Kringstad Vedde med 19/100 til 22.21 og «veteranen» Torbjørn Lysne er i framgang, 22.33 vart det denne gongen. Både Torbjørn og Tor gjorde i tillegg fine harejobbar på 800m seinare på kvelden. På den distansen var Kristoffer Grindedal raskast av våre med årsbeste 1:55.61, medan Johannes Teigland persa med 1/100 til 1:56.96 og tok heim sigeren i B-heatet med det. Også fin pers av Timmi Anderl som fekk 2:02.08.

3000 var den mest populære distansen på stemnet med heile fem herreheat og to dameheat, og også øvinga med det høgaste nivået. I det knallsterke A-heatet gjorde Marius Vedvik nok eit solid løp, men 7:57.83 heldt berre til fjerdeplass denne gongen. Jacob Boutera persa med sekundet til 8:05.24, men var ikkje heilt nøgd med det. Bjørnar Sandnes Lillefosse gjorde sitt første løp i årets utandørssesongen og fekk pene 8:06.35. Alle tre har nok meir inne. I B-heatet noterer vi oss at Eldar Thomassen Fagerbakke, som framleis har sommarovergang til Bøler, persa igjen, 8:20.01 vart det denne gongen. Matias Andersen Førde har persa på alt frå 800 til 10000 i år, og det vart nok ein pers (8:37.36) på jølstringen denne gongen. Solide persar vart det på Daniel Jacobsen (8:55.55) og Ken-Tony Johansen (8:57.30), begge kom under 9:00 for første gong. Daniel Måkestad Fadnes fekk 9:55.37 og var litt bak persen. I dameheata var det flott løping på alle våre: Ine Bakken (bildet) persa med knappe fem sekundar til 9:31.72 og tok ein sterk andreplass i heatet. Ingrid Kristiansen løp sin beste 3000m i Gulardrakt med 9:59.06, og Maria Sæterstøl persa solid til 10:47.38.

Massepersing på Bislett, Jacob raskast på 1500m

(15.07.2020) Under kveldens sommarstemne på Bislett vart det mange persar på våre løparar. Persing på midt-i-veka stemne på Bislett var eit velkjent fenomen på 70-,80- og 90-talet og er det fortsatt. Når utøvarar frå ulike delar av landet møtest i hovudstaden ein sommarkveld går det unna!

På 1500m var det flott løping av fleire, med plsseringane 1-2-4 i det beste herreheatet. Etter flott harejobb av Håkon Mushom i 900 meter tok Mats Hauge over føringa, men då klokka ringte for siste runde tok Jacob Boutera (bildet) teten og heldt den til mål. Jacob fekk 3:43.03 som er like bak pers og Mats persa til 3:43.37. Imponerande av to løparar som hadde lengre treningsavbrekk i haust/vinter på grunn av skade. Desse to tok NM-medalje på 1500m i hhv. 2018 (Mats) og 2019 (Jacob) og vil nok vere med i medaljestriden i 2020 også! Mats løp seg også inn på klubbens eksklusive 10-på topp liste på distansen og skubba dermed ein annan haugesundar, John Harris Christensen, ut av topp-10. Marius Vedvik gjorde også eit solid løp og vart nr. 4 på 3:45.91. Vidare fekk Sondre Hoff 3:58.35 som er like bak pers, Johannes Teigland persa til 4:01.82, Daniel Jacobsen fekk 4:08.72 og Ragnar Nersten persa til 4:09.73. Ine Bakken gjorde også eit sterkt løp og persa med heile fem sekundar til 4:32.05.

På 100m var Even Meinseth i storslag og vann både forsøk og finale, med 10.39 (+2.4) i forsøket og pers 10.51 i finalen. På 400m pressa Tor Kringstad Vedde årsbestetida ned til 48.76, og på 10000m løp Magnus Sirnes Hjellum på pene 31:32.96 og dermed er også han klar for NM. Ein sterk 10000m leverte også Matias Andersen Førde på Førde stadion onsdag, då han kom inn på 31:48.48 i sitt første løp på distansen. Dermed klarte han også NM-kravet, sjølv om det var uklart ei stund om tidene kunne godkjennast på grunn av manglande sarg på bana i sunnfjordbyen, men det siste vi har høyrt er at tidene i løpet blir godkjent.

Sterk løping på Bislett

(08.07.2020) I kveld hadde vi mange aktive i aksjon på Bislett og eit par i Arna. Fasiten vart to nye NM-kvalifiserte og to persar. Under stemnet på Bislett årsdebuterte Tor Kringstad Vedde med pene 48.81 på 400 meter, og sunnmøringen viste med det at han nærmar seg 2018-formen. Sterk løping også av Robin Wathne Nedrehagen, som vann B-heatet på 800 meter med 1:54.93, pers med snaut sekundet og 6/100 under NM-kravet. I A-heatet på 800 meter fekk veteranen Kristoffer Grindedal notert årsbeste med 1:55.67. På 200 meter gjorde Even Meinseth eit bra løp og vann på 21.53 i eit heat der alle var eit stykke bak årsbeste. Det er lenge sidan Even har slått Mathias Hove Johansen på 200m, men det gjorde han i kveld. Sondre Lindaas Gjesdal fekk 22.35 i same heat, men snubla ved målpassering og skada seg dessverre slik at han no er ute for resten av sesongen. 3000m meter vart også ei hyggeleg øving, med solide persar både på Sondre Hoff (8:22.91) og Eldar Thomassen Fagerbakke (8:21.01, har ferieovergang til Bøler). Eldar overtok også familierekorden frå pappa Per Thomas. På 800m for kvinner vart det årsbeste 2.12.57 på Ingrid Kristiansen medan Tuva Thomassen Fagerbakke noterte 2:21.94.

I Arna vart det årsbeste på 400m til Sivert Fløgstad Sellevold med 50.34, NM-kravet på 49.75 er innan rekkevidde! Superveteranen Morten Solheim noterte 12.25 på 100m.

På bildet ser vi Even til venstre og Tor til høgre, tatt etter ei treningsøkt i Grimstad

Flott 1500-pers av Ingrid: 4:24.45!

(03.07.2020) Under eit løpsstemne i Sandnes i kveld slo Ingrid Kristiansen til med solid pers på 1500m: 4:24.45. Dette er pers med vel 5 sekund, og fører henne opp på fjerdeplass gjennom tidene på klubbstatistikken. Ingrid var berre 17/100 bak Christina Toogood som var raskaste kvinne i Sandnes denne kvelden. Tidlegare i veka løp Ingrid på 2:14.38 åleine under eit stemne i Stavanger under ikkje altfor gode forhold. På bildet ser vi Ingrid som nr.3 frå venstre, Christina Toogood heilt til venste og trearen Vilde Våge Henriksen til høgre.

Under eit stemne på Os 25. juni kasta 18-åringen Sebastian Wichstrøm Rolland frå vår samarbeidsklubb Hovding 58.10 med seniorspydet. Dette er pers med nesten 7 meter, klubbrekord i junior-19, og kanskje aller viktigast: 10 cm over kravet til NM senior. Det er ein del år sidan vi har hatt ein kastar i herreklassen NM-kvaifisert, den forrige var så vidt vi kan sjå Inge Tansø som kasta spyd for Gular under NM i Tønsberg i 2013. I Hovding er det solid klubbrekord med det nye spydet, men med det gamle spydet er klubbrekorden der 61.42 frå 1965 – den blir nok også passert etter kvart!

Ny flott kveld på Fana – sterk 10000 og mange nye NM-kvalifiserte

(01.07.2020) Det siste av Gular og Gneist sine Korona-stemne skapte nok ein flott kveld på Fana stadion. Toppen var sjølvsagt 10000m med internasjonalt nivå, men masse-persing på fleire distansar og for Gular sin del fire nye NM-kvalifiserte gjorde at dei aller fleste gjekk glade heim. Kveldens høgdepunkt var sjølvsagt A-heatet på 10000m. Etter flott harejobb av Sindre Buraas (14:15 på 5000), heldt tetfeltet fram i same fart, men tetfeltet krympa etter kvart og både vår eigen Marius Vedvik og alle triathletane måtte etter kvart sleppe. På sisterunden viste Zerei Mzengi frå Stavanger FIK seg som den sterkaste, og den norske meisteren vann på 28:23.86 føre Norges toppløpar på maraton Sondre Nordstad Moen (28:25.55). Dermed var banerekorden frå Hellas-Norge landskampen i 1980(!) historie. Marius kom inn til femteplass på 29:04.66, hans tredje beste løp nokon gong og beste på norsk bane. Så får vi tru at det byr seg fleire sjansar til å slå trenar Arne Risa sin 49 år gamle kretsrekord på 28:24.41 utover sommaren.

I B-heatet løp ‘veteranane’ Ivar Stefansson og Tomas Windheim jamnt heile vegen, og klarte NM-kravet med god margin (31:39.41 og 31:44.75). Ivar debuterte på distansen, medan Tomas løp over halvminuttet fortare enn den gamle persen frå 2012. Og, Ivar har no betre pers enn Therese Johaug! Også flott debut på distansen av ein av våre løparar frå Odda, Ken Tony Johansen, 32:34.06 er hans beste løp nokon gong alle distansar sett under eitt. I C-heatet løp ein annan odding, Daniel Fadnes (fyller 16 seinare i år) på 36:07.74.

På 5000m for kvinner kom alle våre tre under NM-kravet på 18:00, Adele Henriksen løp på 17:25.72 som er kretsrekord i jenter 18 år, Hilde Brennskag fekk 17:44.09 og heldt såvidt unna for spurten til Ingrid Revheim (17:44.16). Elles vann Mats Hauge 800m på si beste tid for Gular, 1:53.13, medan Matias Førde persa til 1:58.30 og Timmi Anderl persa til 2:02.94. PÅ 300m hekk vann Andreas Haara Bakketun med 37.32, medan det vart 35.62 på Torbjørn Lysne og 361.7 på Sivert Sellevold på 300m flatt.

Sterk sprint av Even

(30.06.2020) Det har vore mange Gular-løparar i aksjon dei siste dagane, både på Lillehammer og Bislett. På Lillehammer i helga tok Even Meinseth heim samanlagtsigeren på Veidekkesprinten etter fire fine løp på kortsprint. På 60m og 150m laurdag vart det kretsbestenoteringar (6.71 og 15.56), og på dei meir vanlege distansane 100m og 200m på søndag vart det 10.52 og 21.21, begge løpa i litt for sterk medvind. På 200m var det imidlertid kraftig motvind i svingen. Even vann 60m og 100m, men vart så vidt slått av Mathias Hove Johansen på dei to lengste distansane. Søndag var også Daniel Alejandro Johnsen med og fekk bokført 10.88 og 21.75 i litt for sterk medvind.

Måndag og tysdag hadde store delar av friidretts-Norge samla seg på Bislett til Boysen memorial. På 5000m måndag vart det persar på alle våre. Jacob Boutera gjorde comeback etter langvarig skade og fekk notert pene 14:12.29. Han forbetra dermed den tre år gamle persen med nokså nøyaktig eit minutt (!), og dette lovar bra for resten av sesongen for jus-studenten. Den konkurranseglade jølstringen Matias Førde persa solid nok ein gong og fekk bokført 15:00.59, berre 6/10 bak NM-kravet. I neste løp på ein av distansane 1500m eller lenger reknar vi med at han tar NM-kravet. Johannes Teigland har klart NM-kravet på 3000m, og persa her til 15:04.64. Våre tre løp i kvar sine heat. Heatet til Johannes vart vunne av Eldar Thomassen Fagerbakke, som i sommar ferierepresenterer Bøler IF. Med 14:39.99 persa han med over halvminuttet og slo pappa Per Thomas sin familierekord med vel 2 sekund. I dameheatet gjorde Ine Bakken eit kjempeløp og vart nr. 3 på 16:30.34, pers med rundt 40 sekundar og berre 13 sekundar bak klubbrekorden til Frida Berge (no Reiersølmoen).

Tysdag var det 100m, 200m og 800m for våre. På 100m vart det 10.98 på Daniel og 11.02 (pers) på Sondre Lindaas Gjesdal, og på 200m fekk desse to notert 22.11 og 22.27, her var Andreas Haara Bakketun raskast av våre med 21.88. Alle hadde godkjent medvind i sine løp. På 800m vart det 2:22.16 på Tuva Thomassen Fagerbakke, og flotte persar på dei tre gutta som var med: 1:55.85 på Robin Wathne Nedrehagen, 1:55.89 på Sondre Hoff, og 1:59.54 på Oddne Teigenes.

Kjempeløp av Andreas: 47.44 på 400m!

(21.06.2020) Andreas Haara Bakketun sin råsterke 400m på Fana i dag avslutta ei veke med mange sterke Gular-prestasjonar. Med 47.44 forbetra han både sin eigen pers (48.95) og Sondre Dingsør sin junior-19 klubbrekord (48.96) med halvanna sekund, og det er litt av eit jafs på ein såpass kort distanse!

Vi startar oppsummeringa av dei andre stemna på Fana onsdag, der Gular og Gneist arrangerte Korona-stemne nr. 2. Even Meinseth vann 200m på 21.46 som er hans beste tid sidan topp-sesongen 2015! Her fekk Sondre Lindaas Gjesdal 22.16 og Daniel Alejandro Johnsen 22.28. På 1500m viste Mats Hauge seg som den sterkaste etter at haren ga seg, og løp på flotte 3:45.92 som er hans nest beste løp gjennom tidene og det beste i Gular-drakt – persen hans er 3:45.07 i Haugesund-drakt i fjor. Marius Vedvik fekk 3:49.00 på andreplass, og både Sondre Hoff (3:57.59) og Matias Førde (3:58.04) kom under 4:00 for første gong.

Same kveld var det seriestemne i Arna, der vår veteransprinter Morten Solheim sette ny kretsrekord på 300m i MV 40 med pene 37.94. Måndag løp Ingrid Kristiansen 800m på Jærcup i Sandnes, og sette årsbeste med 2.12.93 i eit mixløp der ho var raskaste kvinne. I Trondheim laurdag persa Erlend Hognestad Nilsen til 11.19 på 100m, og dermed er også han kvalifisert for NM. Sist søndag løp Christine Bjelland Jensen 100m på 12.51 på Bislett.