Overgangslista 2021 – nokon kjem og andre går – Jacob Vaula sterkt nytt namn

(08.01.2021) Som vanleg på denne årstida kjem det på friidrett.no ei liste over dei som har skifta klubb ved årsskiftet.
Her er inn/utmeldingane av Gular. Jacob Vaula er det sterkaste nye namnet – han tok bronse på 100m under NM på Fana i fjor.
Vi ønsker dei nye velkomne og dei som melder seg ut lukke til vidare!

Inn:
Jacob Vaula (Stord)
Sebastian Plows (Nittedal)
Tore Akerlie (Voss)
Eivind Trym Wikshåland (Tjalve)

Ut:
Jacob Boutera (Ull/Kisa)
Daniel Alejandro Johnsen (Ask)
Magnus Sirnes Hjellum (OSI)
Christine Bjelland Jensen (Norna-Salhus)

Sterkt løp av Bjørnar på Hytteplanmila

(18.10.2020) Våre løparar held koken utover hausten, med fleire sterke resultat på landevegen. Under Hytteplanmila i går leverte Bjørnar Sandnes Lillefosse nok eit sterkt løp og vart nr. 3 på 28:45, i eit løp der topp 3 var dei same som på 10000m på Fana for ein månad sidan. Johannes Teigland var også med og vart nr. 38 på pene 31:07.

Heime i Haugesund tok Mats Hauge ein klar siger (vel minuttet føre neste løpar) i tradisjonsrike Djupadalten på 28:17, her vart Daniel Jacobsen nr. 5 på 30:13. Marus Vedvik sett løyperekord i halvmaraton i Fana på 1:06.11, og søskena Espen (som spring for Fri) og Amalie Joensen løp stafett på Brakvatnet halvmaraton og var første lag i mål på 1:13.46. Her vann Ingrid Revheim halvmaraton på 1:28.36. Vi tar også med at sist helg tok Ine Bakken ein fin sjetteplass i NM terrengløp lang løype i Skien.

Gull til Marius og Adele under NM halvmaraton

(04.10.2020) Under NM halvmaraton på Jessheim laurdag vart det to gull til Gular. Marius Vedvik vann herreklassen på pene 1:04.41 etter eit spennande oppgjer med Isaac Tesfamichael frå Leksvik og Eivind Øygard frå Jølster. Haren Sigurd Ruud Skjeseth drog i jamt tempo til rundt 13 km, og deretter vart det eit til tider taktisk oppgjer sjølv om farten i tetfeltet heldt seg oppe. Eivind måtte sleppe på dei siste kilometrane, og nokre hundre meter før dei svinga inn igjen på stadion rykka Marius frå Isaac og vann med 11 sekundar. Marius har jo gode minne frå Jessheim stadion frå før – i 2014 vann han 5000m under NM der. Dette var Marius sitt tiande individuelle NM-gull, og med det har han like mange som trenar Arne Risa. Marius har eit gull på halvmaraton frå før, nemleg frå Trondheim i 2016. Vi tar også med at han løp sin nest beste 1500m nokon gong i Tønsberg tysdag (3:45.67). Våre andre løparar på halvmaraton gjorde det også bra: Martin Finne nr. 10 på 1:08.07, Magnus Sirnes Hjellum nr. 14 på 1:08.24 og Johannes Teigland nr. 33 på 1:11.31, etter det vi kan sjå var det pers på dei to sistnemnde.

I dameklassen gjorde unge Adele Henriksen eit flott løp og kom inn på tredjeplass totalt med 1:16.31, som er pers med vel tre minuttar og ikkje minst beste tid nokon gong i Norge i U20-klassen (ingen offisiell rekord her). I NM halvmaraton er senior og U23 to ulike klasser, og dermed vart det gull i U23-klassen, men ingen medalje i seniorklassen på 18-årige Adele. Det vart også persar på Amalie Joensen (nr. 13 på 1:21.47) og Hilde Brennskag (nr. 24 på 1:26.09). På 10km i Norgesløpet same dag og stad persa Ine Bakken til flotte 34:32, som er beste Gulartid på mila dette året, uansett underlag, og gav ein tredjeplass totalt. Elin Hanevik persa også og fekk 38:13 på niandeplass. Ine og Marius skal i aksjon på NM terrengløp lang løype i Skien komande søndag, og begge burde ha gode medaljesjansar. Marius har for øvrig aldri tatt gull på den distansen!

Onsdag arrangerte Gular Hoka One Bykarusellen Perseløp (5 km) med start og mål i Nygårdsparken, og dette viste seg å vere ei rask løype. I dameklassen tok Gular 7 av dei første 10 plassane, og Ingrid Revheim vann eit jamt oppgjer mot Maike Verhofstad frå Gneist (18:08 og 18:09). Elin Hanevik tok tredjeplassen med 18:21. Raskast av våre i herreklassen var Ken Tony Johansen som vart nr. 11 på 16:11.

I helga var det også veteran-KM på bane på Os, og her tok våre veteranar totalt 17 gull og 7 sølv. Av resultata nemner vi 11.15 med seniorkula av Thomas Mellin-Olsen, som no stiller i klassen 40-44 år. Mestvinnande vart Frank Kvinge med 4 gull i klassen 65-69 år.

Ine persa igjen: 16:27.20 på 5000m

(27.09.2020) Banesesongen nærmar seg slutten no etter NM, men vi har hatt ein del løparar i aksjon denne helga også. Under Kvalheim-mila på Bislett laurdag persa Ine Bakken nok ein gong på 5000m, no til 16:27.20, i eit miksløp der ho hadde god drahjelp av Johannes Teigland. Frida Berge sin klubbrekord på 16:17.27 burde vere innan rekkevidde neste år! Marius Vedvik løp også 5000m på same stemne, men fekk det tungt i siste del av løpet og kom inn på 14:38.38. Ingrid Kristiansen og Eldar Thomassen Fagerbakke hadde tatt turen til Sandnes og Høstlekene utan den heilt store suksessen på 1500m- 4:32.82 på Ingrid og 3:59.32 på Eldar – andreplass på begge to. Sondre Gjesdal vann 100m og 200m på Oslekene (11.35 i motvind laurdag og 22.15 i motvind -1.1 søndag i tilnærma sololøp). 22.15 er berre 6/100 bak utandørspersen, sterkt når ein tar omsyn til forholda.

Tysdag denne veka stod den litt uvanlege distansen 1000m på programmet i Arna, her vann Sondre Hoff på pene 2:26.74 medan Matias Førde vart nr. 4 på 2:31.67, begge tider som er minst på nivå med persane dei har på 800m og 1500m. Sondre Gjesdal var med også her og vann 100m på 11.25. Amalie Joensen løp 5000m på 17:36.71 som er like bak persen.

NM på Fana: 2 gull+ kretsrekord på 10000m!

(20.09.2020) Gular gjorde ein flott innsats under helgas NM på Fana. Totalt 2 gull, 3 sølv og 3 bronse vart det på dei raude og gule etter tre fine haustdagar på Fana, og sist klubben tok så mange medaljar i NM var i Kristiansand i 2012. Medaljerekordane for klubben er 10 (3 gull, 3 sølv og 4 bronse) frå Moss 1990 og 6 gull og 1 sølv frå Stjørdal 1989. På klubbrankingen over medaljar vart Gular nr. 3 eller 4, alt etter korleis ein måler dette. Tjalve var suverene med 9-3-6, og Vidar var også føre oss med 2-6-2, medan det kan diskuterast om Sandnes sine 3-1-0 er betre enn våre 2-3-3.

Fredag tok Even Meinseth sitt første senior-NM-gull utandørs då han akkurat heldt unna for Matias Hove Johansen frå Skjalg (tider: 10.69 og 10.70 i lett motvind). Dette var også første Gular-gull på distansen nokon gong. Sjølv hadde Even eit sølv på distansen frå 2015 som einaste individuelle senior-NM-medalje utandørs frå før. På 400m vart det sølv og bronse til Andreas Haara Bakketun (47.89) og Tor Kringstad Vedde (48.21), medan Torbjørn Lysne vart nr. 6 på 49.60. Sivert Fløgstad Sellevold vart slått ut i forsøket, men persa til 49.51. På 100m vart Erlend Hognestad Nilsen slått ut i forsøket. På 5000m var det roleg tempo i starten i det beste heatet. I ein hard innspurt vart Bjørnar Sandnes Lillefosse nr. 3 på 14:03.98 og Marius Vedvik nr. 5 på 14:04.82. Bjørnar tok faktisk klubbens første bronse på 5000m nokon gong. På 5000m for kvinner vart det pers på alle våre. Ine Bakken persa til 16:29.01 og vart nr. 5 i A-heatet og totalt. I B-heatet vann Hilde Brennskag på 17:22.64 føre Ingrid Revheim, som drog det meste av løpet og fekk 17:23.54. Amalie Joensen vart nr. 5 i heatet på 17:34.18. Totalt vart desse tre nr. 11, 12 og 16. På 1500m fekk vi heile fem mann til finalen, medan Matias Andersen Førde vart utslått. Ingrid Kristiansen gjekk også greit til finale på same distanse.

Laurdag tok Mats Hauge sølv på 1500m på 3:46.99. Vidare vart Jacob Boutera nr. 5 på 3:48.27, Sondre Hoff nr. 8 på 3:52.43, Johannes Teigland nr. 9 på pers 3:53.63 og Eldar Thomassen Fagerbakke nr. 10 på pers 3:54.89. Ingrid Kristiansen vart nr. 8 i eit lureløp på 1500m med 4:41.66. Seinare på kvelden vart både Sondre og Ingrid slått ut i forsøket på 800m. Ine vart nr. 5 på 3000m hinder i sin debut på distansen (10:29.81) etter frisk satsing frå start. På 200m gjekk Andreas greit til finalen, medan Sondre Lindaas Gjesdal og Sivert vart slått ut i semifinalen og Erlend vart slått ut i forsøket. Sivert sette utepers med 1/100 i forsøket då han løp på 22.98.

Søndag tok Andreas sitt andre sølv for helga med 21.79 på 200m, og i spyd vart Sebastian Wichstrøm Rolland nr. 10 med 56.26. 10000m vart eit ‘drama i tre heat’, og Gular var representert i alle tre. I C-heatet var Magnus Sirnes Hjellum nr. 2 og best av våre på 31:09.91, like bak persen. Persar vart det derimot både på Johannes Teigland (31:14.60 og nr. 5 i heatet), og Ivar Stefansson på plassen bak (31:15.36). I B-heatet fekk Eldar Thomassen Fagerbakke det litt tungt på slutten og vart nr. 2 på 30:50.98 i sin første 10000m. Han overtok no familierekorden frå pappa Per Thomas også på denne distansen. Så var det klart for A-heatet. Det gjekk fort frå start, og relativt tidleg i løpet danna det seg eit tetgruppe på tre mann: Zerei Mzengi, Narve Gilje Nordås og vår eigen Bjørnar Sandnes Lillefosse. Zerei stakk frå dei andre litt etter halvveges, og på den siste kilometeren fekk også Narve ei luke til Bjørnar. Bjørnar spurta godt på sisterunden og kom inn på knallsterke 28:23.46 – med god margin beste bronsetid i NM nokon gong. Med det vart han også historisk då han forbetra Arne Risa sin etter kvart legendariske kretsrekord på 28:24.41 frå EM i Helsinki 1971, den gong også norsk rekord. Bjørnar persa med heile 42 sekundar og er no nr. 11 på distansen i Norge gjennom tidene, nokre få hundredelar bak Arne sin harde konkurrent Per Halle. På 10000m for damer gjorde både Adele Norheim Henriksen (nr. 6 på 34:56.10) og Ingrid Revheim (nr. 11 på pers 36:43.01) gode løp. Adele var 12 sekundar bak persen frå Kristiansand tidlegare i år, som det ser ut som ikkje blir godkjent som norsk juniorrekord på grunn av mannleg hare. Dette får vi få sortert ut ved høve – uansett trur vi Adele ordnar opp i denne floka i sitt neste løp på distansen!

Så vart det klart for siste øvinga: 1000m stafett for menn. Gular var favorittar, men på stafett kan ein aldri ta noko for gitt. Even og Torbjørn sørga for leiing etter to etappar, men ein litt sliten Andreas måtte gje ein del meter til Skjalg sin 200m-vinnar Matias Hove Johansen. Tor tok jamt og trutt innpå og tok teten ved utgangen av siste sving, men mjølkesyra melde seg med full styrke på dei siste metrane. Heldigvis heldt det til mål og med 1:54.18 var vi 16/100 føre Skjalg. Dette var Gulars tiande gull på distansen – det forrige kom i Askim i Quincy sin siste sesong 2007. Vi noterer også at veteranen Torbjørn Lysne no har NM-gull på alle sprintstafettane.

Bildet viser den gamle og den nye rekordhaldaren på 10000m.

Gularjentene dominerte Knarvikmila

(06.09.2020) Denne helga har våre aktive deltatt to stader – Knarvikmila og Karabinlekene på Fana stadion. På Knarvikmila vart det Gularsiger i dameklassen både på 5 og 10 km. På 5km vann Ine Bakken på løyperekord 16:41.9, Ingrid Revheim vart nr. 4 på 17:40.9, Amalie Joensen nr. 5 på 17:42.8 og HIlde Brennskag nr. 6 på 17:57.1. På plassane 9-12 finn vi Kjersti Fresvik, Hannah Bjelland, Åshild Teigland Tepstad og Stine Mari Taule. På 10km søndag vart Adele Norheim Henriksen nr. 2 på 34:58.6 På 5km vart Johannes Teigland nr. 5 på 14:48.2, Ivar Stefansson nr. 6 på 15:36.8 og Thomas Myklebust Heggøy vart nr. 10.

På Karabinlekene fredag vann Andreas Haara Bakketun 400m hekk på årsbeste og junior-19 klubbrekord 53.00. Søndag måtte han slå seg knepent slått av Tor Junor Kringstad Vedde på 400m (47.96-48.04). Her sette Torbjørn Lysne årsbeste på 48.95. Elles løp Erlend Hognestad Nilsen 100m og 200m på 11.45 og 23.23 (motvind på begge), og Sebastian Wichstrøm Rolland kasta 53.45 i spyd.

Mats Hauge er no raskare enn Arne Hamarsland – 1500m på 3:39.69 på Bislett på stor Gular-kveld!

(03.09.2020) Under kveldens løpsstemne på Bislett leverte nok ein gong våre løparar flotte prestasjonar. På 1500m var dei tre første i mål dei same som på 1 engelsk mil på den magiske kvelden i Arna for nokre veker sidan (bildet) , og det vart pers på alle tre. Narve Gilje Nordås frå Sandnes vann med 3:39.15, føre våre to sterkaste kort på distansen, Mats Hauge på 3:39.69 og Jacob Boutera på 3:41.08. Sondre Hoff vart nr. 6 på 3:49.94 og kom dermed under 3:50 for første gong. Med dette passerte Mats endeleg Arne Hamarsland sin legendariske 3:39.8 frå 1958 på klubbstatistikken, og han har no berre 44/100 ned til Ove Talsnes sin 32 år gamle klubbrekord og 93/100 ned til Lars Ove Strømø sin 35 år gamle kretsrekord. Jacob avanserte til femteplass på klubbstatistikken.

På 3000m kom også kretsrekorden under press. Marius Vedvik er tilbake i form, og persa til 7:54.56 som er nest best i Gular og Hordaland gjennom tidene og 78/100 bak den 39 år gamle kretsrekorden til Anfin Rosendahl. Dette flotte løpet heldt berre til tredjeplass i eit jamt heat der heile åtte nordmenn løp under 8:00, det trur vi ikkje har skjedd før. Bjørnar Sandnes Lillefosse persa til 7:59.56 og vart nr. 8. Med dette er han også raskaste løpar frå Strandebarm gjennom tidene, med ei tid to sekund raskare enn Sverre Sørnes noterte for eit halvt århundre sidan.

Sist laurdag var det ny-opning av Osterøy stadion, og sprintarane våre leverte gode prestasjonar. På 200m var medvinden akkurat litt for sterk til å få godkjent tidene (+2.1), men både Sondre Lindaas Gjesdal (21.99) og Sivert Fløgstad Sellevold (22.61) løp sin raskaste 200m nokon gong. Erlend Hognestad Nilsen vart nr 3 på 23.02. På 300m sette Andreas Haara Bakketun junior-19 klubbrekord med 34.69. Tysdag hadde Tor Kringstad Vedde tatt turen til Lillehammer, og viste stabil form med å vinne 400m på 48.37.

Dei fire Gularløparane på bildet frå mile-løpet i Arna er frå venstre Jacob, Sondre, Bjørnar og Mats. Marius var ikkje med i det løpet.

Spennande stafett-duell på Gneistspelen

(26.08.2020) Det har vore relativt stille på konkurransefronten etter junior-NM i Kristiansand, men likevel ein del å skrive om. I helga var det Gneistspelen på Fana stadion. For ein gong skuld var det stafett i seniorklassen på eit vanleg stemne, og det vart ein frisk fight mellom Gular og Gneist på 4x400m. Gular var favorittar og tok heim sigeren, men fekk hardare kamp enn venta. Startmannen Sivert Sellevold tapte litt til Gneist, men på andre etappe løp veteranen Torbjørn Lysne Gular til tet inn mot veksling. Andreas Haara Bakketun heldt Gular i tet på tredje etappe og sende Tor Kringstad Vedde ut på ankeretappen med Gneist hakk i hæl. Tor løp ein sterk etappe (etappetid 47.5) heldt unna for unge Thomas Strønstad-Løseth frå Gneist, og i mål skilde det 17/100 (3:16.72 og 3:16.89). Dermed overlevde både kretsrekorden til Gular og klubbrekorden til Gneist dette løpet. Elles frå Gneistspelen noterer vi 11.40 av Erlend Hognestad Nilsen på 100m, 2:03.61 av Timmi Anderl på 800m og pers 4:34.11 av unge Daniel Måkestad Fadnes på 1500m.

Ingrid Kristiansen sette årsbeste på 800m med 2:12.24 og vann løpet under KM for Rogaland i helga, medan 1500m ikkje gjekk like bra (4:36.07). På Bislett tysdag persa Johannes Teigland til pene 3:55.46 på 1500m, medan Ine Bakken var like bak pers på 3000m med 9:33.18.

På Flyplassløpet sist onsdag vart klubben også godt representert. På 10 km vart Adele Henriksen nr. 2 med 35:54, deretter følgde Ingrid Revheim med 38:09, og fjerdeplassen gjekk til Hilde Brennskag med 38:20. På 5km vart Arne Kalland-Olsen og Ivar Stefansson nr. 2 og 3 (15:49 og 15:53), og Hannah Bjelland og Kjersti Fresvik nr. 5 og 6 (19:17 og 19:26). Frå dei djupe skogar i Innlandet tar vi med at veteranen Hallvard Nilsen tok sin niande (!) siger på rad i Krystallmarsjen på Magnor etter å ha vunne ein spurtduell.

Tre gull og tre bronse på junior-NM

(16.08.2020) Fasiten for Gular etter junior-NM i strålande sommarvêr på det blide Sørland (Kristiansand) var tre gull og tre bronse og dessutan to persar.
Gullmedaljane gjekk til Andreas Haara Bakketun på 200m og 400m i U20-klassen, og til stafettlaget vårt (Erlend Hognestad Nilsen, Daniel Alejandro Johnsen, Sivert Fløgstad Sellevold og Andreas). Dessutan vart det bronse til Andreas på 400m hekk og til Daniel på 100m og 200m i U23-klassen. Kortsprinten gjekk i motvind så tidene vart ikkje dei heilt store. Andreas vann greit 200m på 21.76 og 400m på 48.30, mens det vart mykje bom på hekkane på 400m hekk og dermed berre bronse på 55.25. Daniel fekk notert og 11.15/22.38 i finalane på 100m og 200m (og 11.23/22.16 i forsøksheata), medan Erlend vart nr. 6 på 100m (11.52 etter 11.39 i forsøket) og utslått på 200m med 23.16. Sivert persa i forsøket på 400m U23 (49.61 som også er under NM-kravet for senior), og vart nr. 6 i finalen med 49.85. Maria Sæterstøl persa også – med to sekundar på 3000m i U20 og vart nr. 9 på 10:45.59, medan Tuva Fagerbakke Thomassen vart nr. på 800m U23 med 2:22.75 som er snaue tre sekundar bak persen. Spydkastar Sebastian Wichstrøm Rolland vart nr. 6 i U20-klassen på 55.92 som er vel to meter bak persen.

Stafettlaget løp på 1:55.02 som er vel halvsekundet bak klubbrekorden i U23-klassen, og faktisk på hundredelen same tid som Gular vann junior-NM (U21 den gongen) på i 1995, med dagens trenar Erlend Sæterstøl på 200m-etappen på Åkrestrømmen. Daniel løp Gular til tet på andre etappe, og sjølv om Sivert måtte sleppe ein mann forbi seg på slutten, fekk Andreas eit godt utgangspunkt. Han tok teten tidleg på bortre langside og var 84/100 føre Tyrving i mål.

På bildet – stafettlaget saman med trenar og helgas lagleiar. Frå venstre framme: Andreas, Daniel, Erlend og Sivert. Bak: Erlend Sæterstøl og Per Godvik.